CCLXXXI.

1393, o. T. Breslau.

Das Collegiatstift zum heiligen Kreuz in Breslau verkauft die Mühle bei dem Dorfe Frankenberg an das Kloster.

Nos infrascripti Johannes Colmos custos, Heinricus Bolczchyn, Johannes Siczczyn, Gregorius de Gorka, Nicolaus de Olavia, Nicolaus Sanne, Johannes de Budissin, canonici, totumque capitulum ecclesie sancte Crucis Wratislaviensis, in nostro generali capitulo, quod circa festum exaltationis vivifice crucis Christi celebrare consuevimus, ad sonum campane capitulariter congregati, maturo et deliberato animo, consilio etiam et tractatu prehabito diligenti, considerantes etiam nostre ecclesie predicte utilitatem evidentem, recognovimus et per presentes recognoscimus universis, nos nostris et ecclesie nostre nominibus vendidisse et per presentes vendimus venerabili patri ac domino, domino Johanni abbati et conventui monasterii in Kamencz Cisterciensis ordinis Wratislaviensis dyocesis molendinum nostrum, quod prope villam Frankenberg districtus Frankensteynensis super aquam sive fluvium Nisa nuncupatum est situatum, cum omnibus et singulis suis pertinentiis ac libertatibus, nullis prorsus exclusis, que dominus Nicolaus de Czeisberg miles in dicto molendino quondam habuit et prout ab eodem ad nos pervenit, et signanter cum una marca, census annui ac cum dominio supremo et infimo in fundo eisdem molendini dumtaxat pro centum et quadraginta duabus cum dimidia marcis grossorum Pragensium, renunciantes quoque universis et singulis iuribus, iuris actionibus, impetitionibus, arrestationibus et aliis impedimentis quibuslibet, quibus predicti dominus abbas et conventus suus possent per nos nostrosque successores quomodolibet impediri. In cuius rei testimonium presentes litteras scribi fecimus, nostro maiori sigillo roboratas. Actum et datum in nostro generali capitulo supradicto sub anno incarnationis dominice millesimo trecentesimo nonagesimo tercio, presentibus honorabilibus viris: dominis Johanne Nigri, canonico Wratislaviensi, Hermanno de Borsnicz, plebano in Prus, ac Nicolao Gunderami, plebano in Petirwycz, testibus ad premissa vocatis, et pluribus aliis personis fide dignis.

Or. Perg. An Cordel von verblichnen rothen Seidenfäden das beschädigte Capitelsiegel.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.